蘋果動新聞報導

2017年12月28日

有佢冇暗瘡嘅Jackeline推有薪家庭假

在職媽媽要兼顧家庭，非常吃力，有美容院就為員工制訂特別請假機制，等員工為照顧家庭休假都可享有薪假，仲騰空房間畀有需要員工帶子女返公司託管。

憑醫暗瘡廣告而為人熟悉嘅Jackeline「綠葉療膚中心」，旗下4間美容院40幾名員工，97%為女性。創辦人楊小玲話美容業工種特殊，行6天工作，但彈性上班，「（返）9個鐘唔係吓吓都要做」，當中有「走盞位」，故容許員工按個別需要事先請假、或喺工作時間處理私務，如接送小孩或出席學校活動等。

佢話措施實行後，員工流失率喺10年間由30%下降至5%，有助挽留人才；雖然公司批出有薪假，因美容師收入主要來自佣金，「如果成日請假，員工自己都冇着數」，故多年來機制未被濫用。

育有一歲大女兒嘅分店主管張太讚公司措施有助解決在職媽媽嘅燃眉之急。而中心去年更獲民政事務局頒發「傑出家庭友善僱主」獎項，今年度計劃明年一月接受報名。